गण्डकी प्रदेशका सभामुखमा शक्तिको दम्भ कि अज्ञानता ?

पोखरा । आइतबार गण्डकी प्रदेशसभामा आगामी आर्थिक वर्ष २०७६/०७७ बारे छलफल गर्ने सम्भावित कार्यसूची थियो । छलफलका लागि दिउँसो १ बजे प्रदेशसभा बैठक बोलाइएको थियो । निर्धारित समयभन्दा निकै ढिलो गरी सुरु भएको बैठक पूर्व निर्धारित कार्यसूचीमा नपुगेरै स्थगित भयो ।

ढिला सुरु हुनु र स्थगित हुनुको कारक भने सभामुख नेत्रनाथ अधिकारी देखिए । तोकिएको समयभन्दा एक घण्टाभन्दा ढिला गरी बैठक सुरु गर्ने कुरामा पनि प्रमुख जिम्मेवार उनै थिए भने अकारण बैठक स्थगित गर्ने पनि उनै भए ।

करिब एक घण्टापछि राष्ट्रिय गानसँगै प्रारम्भ भएको बैठकमा राष्ट्रिय गान बजिसकेपछि सांसदहरु आ–आफ्नो ठाउँमा बस्ने प्रचलन हुन्छ । तर प्रतिपक्षी दल कांग्रेसका सांसदहरु बसेनन्, उठीरहे । विपक्षी सांसद उठिरहे पछि सभामुखले उनीहरुले सुनाउन खोजेको विषय वा विरोधको विषय के हो भनेर एकजना सांसदलाई धारणा राख्न लगाउनुपर्छ । यो परम्परा मात्र नभई संसदीय व्यवस्थाको अहम विषय हो भने संसद नियमावलीमासमेत यो कुरा खुलाइएको हुन्छ । संसद भनेको विरोध र समर्थन गर्ने थलो पनि हो ।

सभामुख अधिकारीले कांग्रेसका सांसदहरुलाई बस्न भने, बोल्न भनेनन्, माइक दिएनन् । तर आफ्नो विरोधबारे जानकारी गराउन र उचित रुलिङको प्रतिक्षा गरेका कांग्रेस सांसदहरु बसेनन्, बरु बोल्न पाउने आशामा उभिइरहे । दुई तीन पटक सभामुखले बस्न आग्रह गरे । विपक्षीले नमानेपछि बैठक नै स्थगित भएको घोषणा गरे ।

उनको यस्तो क्रियाकलाप पछि आक्रोशित बनेका कांग्रेस सांसदहरुले सभामुखले शक्तिको दम्भ देखाएको र विपक्षीलाई बोल्न नदिएको आरोप लगाएका छन् । विपक्षीले उठाएको सरकारसँगको कुरा सभामुख मार्फत रुलिङ हुने सामान्य प्रक्रिया सभामुखले मिचेर सरकारको गोटी बनेको आरोप विपक्षीले लगाएका छन् । सभामुख स्वतन्त्र भई सबैलाई समान व्यवहार गर्नुपर्ने भए पनि शक्तिको दम्भ देखाएको उनीहरुको आरोप छ ।

कांग्रेसले यसअघिका बैठकमा सरकारसँग विभिन्न विषयमा जवाफ मागेको तर जवाफ नआएपछि आज विरोध गरेको थियो । त्यो विरोधबारे ध्यानाकर्षण गराउँद बैठक स्थगित नै गर्नु अलोकतान्त्रिक भएको कांग्रेसको ठहर छ । कतिपयले भने सभामुखको अज्ञानताका कारण विपक्षी उठेर विरोध गर्दा बैठक स्थगित गरेको हुन सक्ने टिप्पणी पनि गरेका छन् ।