यहाँ ६९ दिन घाम अस्ताउँदैन, ९० दिन उज्यालो हुँदैन, जनताले टाइम जोनबाट मुक्ति मागे

एजेन्सी। नर्वेको सोमारोय द्वीपमा १८ मे देखि २६ जुलाइसम्म ६९ दिन घाम नै अस्ताउँदैन । यसका अलावा जाडो महिनामा करिब ३ महिनासम्म घाम नै देखिँदैन । नर्वेको यो टापुले पहिलो ‘टाइम फ्रि जोन’ बन्नको लागि पहल थालेको छ । यसका लागि टापुका ३ सय निवासीहरुले एक अभियान चलाएका छन् । उनहिरुले यो द्वीपलाई समयको सीमाबाट स्वतन्त्र राख्नको लागि टाइम फ्रि जोन अभियान चलाएका छन् । यसको समर्थनमा अदालतमा निवेदन पनि दिएका छन् ।

स्थानीय सांसद केंट गुडमण्डसम्यानले यो निवेदनलाई अगाडि बढाउने फैसला गरेका छन् । केंटका अनुसार उनीहरुलाई नजिकका २ शहर फिनमार्क र नर्डल्याण्डले पनि समर्थन दिएका छन् । यसअघि युरोपियन युनियन पनि डेलाइट सेभिङ टाइम (वर्षमा २ पटक घटी अगाडि बढाउने प्रक्रिया)लाई अन्त्य गर्नेबारे भनिसकेको छ ।

अभियानका नेतृत्वकर्ता केजेल ओव हेविङका अनुसार यसको उद्देश्य निवासीहरुलाई कामका परम्परागत घण्टाबाट मुक्ति दिलाउनु हो । अर्थात यहाँका मानिसहरु जतिबेला जे काम गर्न चाहन्छन् त्यो काम गर्न सकुन् । यहाँका मानिसले यसो गर्दा उनीहरुको स्कुल कलेज र कामकाजको समयमा लचकता आउने आशा गरेका छन् ।

यहाँ पर्यटन र माछापालन आम्दानीमा मुख्य माध्यम हुन् । युरोप घुम्न जाने पर्यटकले अलग अलग शहरमा पुलमा ताला देख्छन् तर नर्वेका यी द्वीपमा पुलमा घडीहरु देखिन्छन् । हेविंगका अनुसार लामो समयसम्म रात रहनु वा दिन नढल्दा रात दिनको अर्थ रहँदैन । यही कारण तनाव हुन्छ । मानिसहरु समयको जंजालमा नफसुन् र खुलेर जिन्दगी बाँचुन् भन्ने अभियानको उद्देश्य हो ।