चेल्सी फर्किए लाम्पार्ड

एजेन्सी । चेल्सीले पुर्व मिडफिल्डर फ्रान्क लाम्पार्डलाई क्लबको मुख्य प्रशिक्षकमा नियुक्त गरेको छ । लिजेण्ड खेलाडी लाम्पार्डलाई चेल्सीले तीन बर्षका लागि क्लबमा अनुबन्धन गरेको हो ।

४१ बर्षका लाम्पार्डले च्याम्पियनसिप क्लब डर्बी काउन्ट्रीको बसाई बिट मार्दैै लण्डन क्लब फर्कने निर्णय गरेका हुन् । उनले चेल्सीमा १३ बर्ष बिताएका थिए । उनले मुख्य प्रशिक्षक माउरिजियो सर्रीको स्थान क्लबमा लिनेछन् । सर्री ईटालियन महारथी क्लब युभेन्ट्स लागेपछि लण्डन क्लब प्रशिक्षक विहिन अवस्थामा थियो ।

डर्बी काउन्ट्रीको नेतृत्व गरेका लाम्पार्ड च्याम्पियनसिपको प्लेअफ फाईनलमा पराजित हुदै शीर्ष डिभिजनमा उक्लिन बञ्चित भएका थिए । एक सिजन दोस्रो डिभिजनको क्लबको नेतृत्व गरेका लाम्पार्ड निर्णायक खेलमा एस्टन भिल्लासंग पराजित भएका थिए ।

ईङ्ल्याण्डका अन्तराष्ट्रिय खेलाडी समेत रहेका लाम्पार्डले ६ सय ४८ पटक क्लबबाट खेलेका थिए । उनले चेल्सीमा रहदाँ मुख्य ११ उपाधि जितेका थिए । फिफाले चेल्सीमाथि दुई ट्रान्सफरमा खेलाडी खरिदमा प्रतिबन्ध लगाएको छ । लाम्पार्डले अब प्रतिबन्धित अवस्थामा चेल्सीको कमान्ड सम्हाल्ने चुनौती मोल्नेछन् ।

डर्बीले चेल्सीसंग छलफल गर्न समय दिएको ९ दिनपछि लाम्पार्ड पुर्व क्लबको मुख्य प्रशिक्षकमा नियुक्त भएका हुन् । लण्डन क्लब किनेपछि मालिक रोमन अब्रामोभिचले १० औ प्रशिक्षकको रुपमा लाम्पार्डलाई क्लबको जिम्मा लगाएका हुन् ।