दुर्घटनामा दुईको मृत्यु, चार घाइते

धनुषा जिल्लाको महेन्द्रनगर सडकखण्डमा सवारी दुर्घटना हुँदा दुई जनाको मृत्यु भएको छ।

जनकपुर महेन्द्रनगर सडकखण्डमा आइतबार अपराह्न टाटा विंगर र अटो रिक्सा एक आपसमा ठोक्किदा दुई जनाको घटनास्थलमै मृत्यु भएको छ भने ४ जना घाइते भएका छन्।

महेन्द्रनगरबाट जनकपुरतर्फ आउँदै गरेको ना१ज ७०२२ नम्बरको विंगर र जनकपुरबाट महेन्द्रनगरतर्फ जाँदै गरेको ज१ह ४८९६ नम्बरको टेम्पो क्षिरेश्वरनाथ नगरपालिका वडा नं. ४ हरैया नजिक एक आसपमा ठोक्किँदा दुर्घटना हुन पुगेको प्रहरीले बताएको छ।

प्राप्त जानकारी अनुसार मृतक दुई जनामा एक महिला र एक पुरुष रहेका छन्। धनुषाको रमेशपुर बस्ने अन्दाजी ७२ वर्षका रामदेव साहको घटनास्थलमै मृत्यु भएको छ भने मृतक महिलाको नाम ठेगाना खुलेको छैन।

मृतक महिला भने अन्दाजी ५० वर्षीया रहेको इलाका प्रहरी कार्यालय महेन्द्रनगरले जनाएको छ। उक्त दुर्घटनामा घाइते हुनेमा टेम्पो चालक रोशन साह र अन्य यात्रु छन्। उनीहरुको अवस्था गम्भीर छ। उनीहरुलाई उपचारको लागि जनकपुर अञ्चल अस्पताल लगिएको प्रहरी बताएको छ।