ट्युनिसियामा राष्ट्रपति निर्वाचनको मिति तय

ट्युनिस ।  ट्युनिसियामा नयाँ राष्ट्रपति चयनका लागि आगामी सेप्टेम्बार १५ तारिखका दिन निर्वाचन हुने भएको छ। उत्तर अफ्रिकी मुलुक ट्युनिसियाका बहालवाला राष्ट्रपति बेजी काइद इसेब्सीको निधन भएर पद खाली भएकाले निर्वाचन हुन लागेको हो।

स्वास्थ्यमा समस्या आएपछि ट्युनिसियाको सैनिक अस्पताल भर्ना हुनुभएका बेजीको ९२ वर्षको उमेरमा यही जुलाई २५ तारिखका दिन निधन भएको हो। उनलाई निधनअघि एक महिनामै दास्रोपटक अस्पताल भर्ना गरिएको थियो । उनी संसारका ज्येष्ठ राष्ट्रप्रमुख मध्येमा पर्दथे ।

स्वतन्त्र उच्चस्तरीय निर्वाचन प्राधिकरणका अधिकारीहरूले सेप्टेम्बर १५ तारिखका दिन राष्ट्रपति चयनका लागि निर्वाचन गर्ने बारेमा बुधबार जानकारी दिएका हुन्। प्राधिकरणले राजनीतिक दलसहित सरोकारवालाहरूसँग परामर्श गरेर निर्वाचनको मिति तय गरेर घोषणा गरेको जनाएको छ।

राष्ट्रपति पदका लागि प्रतिस्पर्धा गर्न चाहने उम्मेदवारहरूलाई अगस्ट २ देखि ९ सम्म उम्मेदवारी दर्ताका लागि समय तोकिएको छ।उम्मेदवारहरूलाई प्रचारप्रसारका लागि सेप्टेम्बर २ देखि १३ सम्मको समय दिनेगरी निर्वाचन तालिका बनिसकेको अधिकारीहरूले बताएका छन्। उनीहरूका अनुसार निर्वाचन भएको दुई दिनमा मत परिणाम सार्वजनिक हुने अपेक्षा गरिएको छ। रासस