एमिनेमको ‘-याप गड’लाई युट्युबमा एक अर्ब पटक हेरियो(video)

हिपहप स्टार एमिनेमको अर्को भिडियोलाई युट्युबमा एक अर्ब पटक हेरिएको छ । ४७ वर्षीय गायकको ‘-याप गड’ ले सन् २०१३ मा रिलिज भएको ६ वर्षपछि एक अर्ब भ्यूजको कोशेढुङ्गा पार गरेको हो ।

शुक्रबार एमिनेमले आफ्नो इन्सटाग्राम र ट्वीटरमा ‘-याप गड’लाई एक अर्ब भ्युको कोशेढुङ्गा पार गर्न सहयोग गर्न आग्रह गरेका थिए ।

१ अर्ब पटक हेरिएको भिडियोको कोशेढुङ्गा पार गरेको एमिनेमको यो तेस्रो भिडियो हो । यसअघि उनको ‘नट अफ्रेड’ र ‘लभ द वे यु लाई’ लाई युट्युबमा १ अर्ब पटक भन्दा बढी हेरिसकिएको छ ।

अहिलेसम्म लुई फोन्सी र ड्याडी याङ्कीको ‘डेस्पासिटो’ गीत युट्युबमा सर्वाधिक हेरिएको भिडियो हो । हालसम्म यो गीतलाई ६.६ अर्ब पटक हेरिएको छ ।

सन् २०१२ मा रिलिज भएको दक्षिण कोरियाली गायक ‘साई’ को ‘गङनम स्टाइल’ गीत युट्युबमा एक अर्ब पटक हेरिने पहिलो भिडियो थियो । यसलाई अहिले ३.५ अर्बपटक भन्दा बढी हेरिसकिएको छ ।

सन् २०१५ मा विज खालिफा र चार्ली पुथको ‘सी यू अगेन’ एक अर्ब पटक हेरिने पहिलो -याप भिडियो बनेको थियो । स्वर्गीय अभिनेता पाउल वाकरको सम्झनामा बनाइएको उक्त गीतले ६ महिनामा नै उक्त कोशेढुङ्गा पार गरेको थियो ।