चुनाब हारेका ट्रम्प कसरी राष्ट्रपति बनिरहन सक्छन् ? ह्वाइट हाउसमा दोस्रो कार्यकालको तयारी

काठमाडौं। अमेरिकी राष्ट्रपतिको निर्वाचनमा बहालवाला राष्ट्रपति डोनाल्ड ट्रम्प पराजित भएको घोषणा भइसकेको छ । डेमोक्रेड उम्मेदवार जो बाइडेन विजयी भएको घोषणा गरिसकिएको छ । तर, ट्रम्प हार मान्ने पक्षमा छैनन् । उनले आफूले चुनाब जितेको दावी गर्दै आएका छन् । निर्वाचन परिणाम उल्ट्याउन उनले कैयौं मुद्दा पनि हालेका छन् । यस्तोमा अहिले उठेको महत्वपूर्ण प्रश्न हो, के चुनाब हारेका ट्रम्प दोस्रो कार्यकालका लागि राष्ट्रपति बनिरहन सक्छन् ।

अमेरिकी विदेश मन्त्री माइक पोम्पियोले पनि केही दिनअघि अर्को ट्रम्प प्रशासनलाई सत्ता हस्तान्तरण गरिने बताएका थिए । पोम्पियोले अर्को ट्रम्प प्रशासन भन्नुको अर्थ उनले ट्रम्पको दोस्रो कार्यकाल भन्न खोजेका थिए । पोम्पियोले पनि ट्रम्पको दोस्रो कार्यकालको कुरा गरेपछि के ट्रम्प हारेर पनि राष्ट्रपतिमा कायमै रहने कुनै विकल्प छ ? भन्नेबारे चासो बढेको छ ।

द गार्डियनको रिपोर्टअनुसार ट्रम्पको कार्यकाल दोहोरिने संवैधानिक विकल्प भने छैन । यद्यपि अमेरिकामा ट्रम्प र उनको पार्टीका नेताहरुले सत्तामा कायमै रहने हरसम्भव प्रयास गर्नेतर्फ चिन्ता जाहेर गर्न थालिएको छ । यद्यपि ट्रम्पसँग सत्तामा कायमै रहने कुनै संवैधानिक विकल्प भने बाँकी छैन किनकि आगामी डिसेम्बर १४ देखि बाइडेनलाई नयाँ राष्ट्रपति बनाउने प्रक्रिया सुरु हुने तय छ । १४ डिसेम्बरमा इलेक्टोरल कलेजको बैठकमा मतदान हुनेछ ।

अहिलेसम्मको पूर्वानुमानअनुसार यस क्रममा बाइडेनले २७० भन्दा कैयौं धेरै मत पाउने अनुमान गरिएको छ । यी मतले बाइडेनको जीत सुनिश्चित गर्नेछन् । अहिलेसम्म यस्तो कुनै प्रमाण पनि भेटिएको छैन जसले चुनाबमा धाँधली भएको पुष्टि गर्न सकोस् । निर्वाचन अधिकारीले यो निर्वाचनलाई अमेरिकी इतिहासकै सबेभन्दा सुरक्षित निर्वाचन भनिसकेका छन् । क्यालिफोर्निया युनिभर्सिटीका कानुनका प्राध्यापक रिचर्ड हसेन भन्छन् यदि देशमा कानुनको राज जारी रह्यो भने ट्रम्पसँग सत्तामा रहिरहने कुनै संवैधानिक अधिकार छैन ।

ट्रम्प राष्ट्रपतिमा रहिरहने संवैधानिक विकल्प देखिँदैन तर ह्वाइट हाउसमा भने ट्रम्पको दोस्रो कार्यकालको तयारी सुरु भइसकेको पोलिटिकोको रिपोर्टमा उल्लेख छ । ह्वाइट हाउसका ट्रेड एडभाइजर पिटर नावारोले शुक्रबार ट्रम्प प्रशासनले ह्वाइट हाउसमा आफ्नो दोस्रो कार्यकाल थपिने शैलीमा काम गरिरहेको बताएका छन् । निर्वाचनको परिणाममाथि नै हस्तक्षेप गर्ने गरी आगामी बाइडेन प्रशासनले ट्रम्पका कैयौं नीतिहरु खारेज गर्न सक्ने सम्भावनालाई पनि बेवास्ता गरिएको उनले बताएका छन् ।

‘हामी ह्वाइट हाउसमा दोस्रो कार्यकाल थपिने विश्वासका आधारमा अगाडि बढिरहेका छौं’नावारोले फक्स बिजनेससँगको कुराकानीका क्रममा भने । राष्ट्रपति ट्रम्पले बाइडेनको जीन स्वीकार गर्न मानिरहेका छैनन् । सीएनएनका अनुसार ट्रम्प प्रशासनले बाइडेनको टिमलाई कुनै सहयोग समेत गरिरहेको छैन र विदेश विभागमार्फत बाइडेनलाई आएका सन्देशहरु पनि दिइएको छैन । ‘जबसम्म हामीले यस्तो गरिरहन्छौं, हाम्रो धारणा भनेको दोस्रो कार्यकाल हो’ नावारोले भने ‘जो बाइडेनले के गर्न सक्छन् भन्ने अनुमान अहिलेको लागि परको कुरा हो ।’