पाकिस्तानमा अल्पकालिन संकटकालको घोषणा

काठमाडौं । पाकिस्तानमा पछिल्लो केही सातादेखि बाढी पहिरोको चपेटामा पर्दा कयौंको ज्यान गएको छ भने हजारौं घरबारविहीन भएका छन् ।

पाकिस्तानकी जलवायुमन्त्रीले देशको एकतिहाइ भूभाग बाढीका कारण पूरै डुबानमा परेको बताउनुभएको छ । विनाशकारी बाढीले सडकहरू बगाइदिएको छ भने घरहरू तथा बालीनाली नष्ट गरिदिएको र जताततै विध्वंस मच्चिएको छ । जुनमा मनसुन लागेयता पाकिस्तानमा ज्यान गुमाउनेहरूको संख्या एक हजार एक सय ३६ पुगिसकेको अधिकारीहरूले बताएका छन् ।

यसपालिको वर्षा एक दशकयताकै सबभन्दा भीषण भएको बताइएको छ । बितेको २४ घण्टामा मात्र ७५ जनाको मृत्यु भएको अधिकारीहरूले बताएका छन् । उक्त संख्या अझै बढ्ने ठानिएको छ । विदेशमन्त्री बिलावल भुट्टो जरदारीले मारिनेमध्ये एकतिहाइ बालबालिका भएको आकलन गरिएको बताएको बीबीसीले उल्लेख गरेको छ ।

करिब तीन करोड ३० लाख पाकिस्तानीहरू बाढीबाट प्रभावित भएको अधिकारीहरूले अनुमान गरेका छन् । यसको अर्थ प्रत्येक सात जनामध्ये एक पाकिस्तानी नागरिक बाढीले प्रभावित छन् । उत्तरी स्वाट उपत्यकामा पुल तथा सडकहरू बगेपछि गाउँहरू सम्पर्कविच्छेदको अवस्थामा छन् । पर्वतीय क्षेत्रमा बस्ने हजारौँ मानिसहरूलाई सुरक्षित स्थलतर्फ जान भनिएको छ ।

हेलिकोप्टरको मद्दतले समेत सबैलाई उद्धार गर्न सकिएको छैन । भाग्न सफल मानिसहरू भिडभाडपूर्ण पालहरूमा जम्मा भएका छन् । सिन्ध तथा बलोचिस्तान सबैभन्दा धेरै प्रभावित प्रान्त हुन् भने खाइबर पख्तुन्ख्वाको पर्वतीय क्षेत्र पनि निकै प्रभावित भएको छ ।

यो वर्षको मनसुनी वर्षा सन् २०१० को विनाशकारी बाढीसँग तुलना गर्न सकिन्छ । पाकिस्तानको इतिहासमा सबैभन्दा घातक ठानिएको सो बाढीमा २,००० मानिसको ज्यान गएको थियो ।