देशैभर मनसुन फैलिन अझै एक साता लाग्ने

काठमाडौं । यो वर्ष औसत समय भन्दा छिटो मनसुन भित्रिने पूर्वानुमान मौसमविद्हरुले गरेका थिए । पूर्वानुमान अनुसार नै जेठ नसकिँदै मनसुन नेपालमा भित्रियो पनि । पूर्वी नेपालबाट छिरेको मनसुन भने उतै अल्मलिएको छ । जसका कारण देशको एउटा भागमा बाढी पहिरोले सताउँदा अर्को भागमा भने प्रचण्ड गर्मी व्याप्त छ ।

मौसमविद्हरुले यो वर्षको मनसुन जुन १३ तारिख अर्थात गत जेठ ३१ गतेदेखि नेपाल भित्रिने पूर्वानुमान गरेका थिए । पूर्वानुमान भन्दा पहिले, जुन १० अर्थात २८ गते नै पूर्वी नेपालबाट मनसुन भित्रियो । मनसुन भित्रिएकै दिन अविरल वर्षाले ताप्लेजुङमा चार जनाको ज्यान पनि लियो भने संखुवासभालगायतका जिल्लाहरुमा पहिरोले घर पनि बगायो । तर मनसुन भित्रिएको एक साता वितिसक्दा पनि मनसुनी वायु अघि बढ्न भने सकेको छैन ।

अहिले मनसुन कोशी प्रदेशको पूर्वी र उत्तरी भेगमा केन्द्रित रहेको र त्यस क्षेत्रमा वर्षा भईरहेको छ । वरिष्ठ मौसमविद् शान्ति कँडेलले सुस्त गतिमा रहेको मनसुन उपत्यकामा मनसुन भित्रिन अझै तीन दिन लाग्ने बताउनुहुन्छ ।

केही दिन यता सामान्य वर्षा हुँदा उपत्यकाको तापक्रम घट्दो क्रममा रहे पनि पश्चिम क्षेत्र र विशेष गरी पश्चिम तराइमा उच्च तापक्रम कायमै छ । महाशाखाका अनुसार गण्डकी प्रदेश र सुदूरपश्चिम प्रदेशमा पश्चिमी वायुका साथै स्थानीय वायुको प्रभावले नयाँ प्रणालीको विकास भए पनि वर्षा प्रभावकारी हुन सकेको छैन । गण्डकीको पोखरा आसपास र सुदूरपश्चिमको दार्चुलामा मात्रै हल्का वर्षा भइरहेको महाशाखाको भनाइ छ ।

देशको पूर्वी क्षेत्र बाहेकका स्थानमा भईरहेको सामान्य वर्षा मनसुनी नभई स्थानीय वायु तथा भारत आसपास रहेको न्यूनचापीय क्षेत्रको आंशिक प्रभावले भएको मौसमविद्हरुको भनाइ छ । मौसमविद्हरुलाई समेत झुक्याईरहेको मनसुनी वायु पुरै देशभरी फैलिन अझै एक साता लाग्ने अनुमान मौसमविद्हरुले गरेका छन् ।