हुम्लामा जिप दुर्घटना, गाउँपालिका उपाध्यक्षसहित कम्तीमा १० जना बेपत्ता

प्रकाशित मिति : मङ्लबार, असार ३, २०७६

काठमाडौँ — हुम्लाको खार्पुनाथ गाउँपालिका-५ कैलावालुमा जिप दुर्घटना हुँदा गाउँपालिका उपाध्यक्षसहित कम्तीमा १० जना बेपत्ता भएका छन् । जिपमा कति जना चढेका थिए भन्रे यकिन भइसकेको छैन ।

लु १ ज ७१६६ जिप सडकबाट करिब २० मिटर कर्णाली नदीमा खसेको हो। बेपत्ता हुनेहरुमा खार्पुनाथ गाउँपालिकाका उपाध्यक्ष सिन्धु हमाल शाही, जिप चालक मणि शाही, यात्रुहरु चन्द्र हमाल, नैनसिंह भण्डारी, बसन्ती शाही, नन्ददेवी सिंह, कौर कामी, उनका दुई वर्षीय छोरा गोकुल सुनार लगायत छन्।

घटनास्थलमा सेना र प्रहरीले उद्दार गरिरहेका छन्। याङ्चु प्रहरी चौकीका इञ्चार्ज सन्तबहादुर ओलीका अनुसार घटना मध्याह्न साढे १२ बजे भए पनि सूचना ढिला आएकाले उद्धारमा ढिलाइ भएको हो।

सेना र प्रहरी टोली घटनास्थलमा खटिए पनि गोताखोर नहुँदा उद्धारमा समस्या भइरहेको स्थानीय पत्रकार राजन रावतले जानकारी दिए।निर्माणाधीन सडकका कारण जिप दुर्घटना भएको अनुमान गरिएको छ।

उद्धारको लागि सदरमुकाम सिमकोटबाट हेलिकप्टरमा नेपाली सेना, सशस्त्र प्रहरी र नेपाल प्रहरीलाई घटनास्थलमा पठाइएको निमित्त प्रमुख जिल्ला अधिकारी महेशकुमार पोखरेलले बताए।