श्रीमतीले हैरान पारेपछि युवकले ३ वर्षको छोरालाई छातीमा बाँधेर बाढीमा हाम्फाले

काठमाडौं। श्रीमान श्रीमतीको झगडालाई परालको आगो भनिन्छ । यो झगडा केही समयमै सेलाउने अपेक्षा गरिन्छ । तर कहिलेकाहीँ यो झगडा यतिसम्म डरलाग्दो हुन्छ कि मानिसहरु निकै खतरनाक कदम चाल्न पछि पर्दैनन् । यस्तै गरेका छन् भारतको पंजाबका एक भेटेरीनरी डाक्टरले । उनलाई श्रीमतीले यतिसम्म हैरान पारिन् कि उनले आफ्ना तीन वर्षको छोरालाई छातीमा बाँधेर नहरमा हाम्फालेर ज्यान दिए ।

पुलिसले उनकी श्रीमती समेत ५ जनाविरुद्ध मुद्दा दर्ता गरेको छ । युवकको नाम छिन्दरपाल सिंह भएको बताइएको छ । उनको बिहे ५ वर्षअघि राजपाल कौरसँग भएको थियो । उनीहरुका तीन वर्षका छोरा र २ महिनाकी छोरी थिए । यी दुईबीच बेलाबेलामा झगडा भइरहन्थ्यो । पछिल्लो केही समय लगातार झगडा भएको थियो । गत मे महिनामा राजपाल झगडा गरेर माइत गएकी थिइन् ।

उनी माइती गएसँगै माइतीले छिन्दरपाललाई उनीविरुद्ध मुद्दा हालिदिने भन्दै धम्की दिइरहन्थे । यसबाट हैरान भएका छिन्दरपालले आफ्ना छोरा अनमोललाई छातीमा बाँधेर नहरमा हाम्फाले । शनिबार उनीहरु दुवैको शव भेटियो । छिन्दरपालले घरमा एक सुसाइड नोट लेखेर राखेका थिए जसमा उनले ससुराती परिवारबाट दिक्क भएर आत्महत्या गर्न लागेको लेखेका थिए । पुलिसले मृतककी पत्नी राजपाल कौर, ससुरा महिन्दर सिंह, सासु परमजीत कौर, सासुकी आमा महिंदरो बाइ र मामा ससुरा जगदीश कुमारविरुद्ध मुद्दा दर्ता गरेको छ ।