पोर्चुगलका एक नागरिक लागूऔषधसहित दिल्ली हुँदै जापान जाने तयारीमै थिए, ‍‍जब…बिमानस्थलमा ….

काठमाडौं । त्रिभुवन अन्तर्राष्ट्रिय बिमानस्थलबाट राहदानी नम्बर सिए ७०१२९२ वाहक पोर्चुगिज नागरिक २५ वर्षीय मेन्डेस पेरिरा टियागोलाई लागूऔषध एम्फेटामाइन जस्तो देखिने पदार्थ करिब ४ केजी ३ सय ८० ग्राम सहित शुक्रबार दिउँसो प्रहरीले पक्राउ गरेको छ।

एयर इण्डियाको बिमानबाट काठमाडौंबाट दिल्ली हुँदै जापान जान लागेका उनलाई विमानस्थलको अन्तर्राष्ट्रिय उडानतर्फको प्रस्थान होल्ड ब्यागेज चेकिङ एरियामा जाँच गर्ने क्रममा सुटकेसभित्र लुकाई छिपाई लैजान लागेको उक्त पदार्थ सहित फेला पारी प्रहरीले पक्राउ गरेको हो।

उनलाई थप अनुसन्धानको लागि लागूऔषध नियन्त्रण ब्यूरो कोटेश्वर पठाइएको अन्तर्राष्ट्रिय विमानस्थल सुरक्षा कार्यालय गौचरले जनाएको छ।

त्यस्तै बाराको महागढीमाई नगरपालिका–१० पसाहाबाट कलैया उपमहानगरपालिका–२ पकडी बस्ने ५५ वर्षीय बीरबहादुर रामलाई अवैध लागूऔषध गाँजा करिब ३५ केजी सहित शुक्रबार राति प्रहरीले पक्राउ गरेको छ।

कलैयाबाट गंजभवानीपुरतर्फ जाँदै गरेको ना १४ प ९०४४ नम्बरको मोटरसाइकल जाँच गर्ने क्रममा चालक रामलाई जिल्ला प्रहरी कार्यालय बाराबाट खटिएको प्रहरीले उक्त परिमाणको लागूऔषध सहित फेला पारी पक्राउ गरेको हो। यस सम्बन्धमा स्थानीय प्रहरीले आवश्यक अनुसन्धान गरिरहेको छ।