आगामी ३ दिन पनि वर्षा हुने, बाढीको जोखिम रहेको भन्दै चेतावनी जारी

काठामडौं। मनसुन न्यून चापीय रेखा नेपालको तराई भू–भाग नजिकै रहेकाले अविरल वर्षा भएको जल तथा मौसम विज्ञान विभाग मौसम पूर्वानुमान महाशाखाले जनाएको छ । महाशाखाले भनेको छ, ‘मनसुनको न्यून चापीय रेखा नेपालको तराई भू–भाग नजिकै अवस्थित छ जसको कारणले अहिले नेपालमा मनसुनी वर्षा सक्रिय हुने देखिन्छ तर अबको २४ घन्टामा मनसुनको न्यून चापीय रेखा अझ दक्षिण तिर सर्ने र मनसुनी गतिविधि कम सक्रिय हुने देखिन्छ।’

मौसम पूर्वानुमान महाशाखाले बुधबार साँझ ६ बजे जारी गरेको सूचनाअनुसार देशभर सामान्यदेखि पूर्ण बदली भई अधिकांश स्थानहरुमा वर्षा भइरहेको छ । पूर्वानुमान महाशाखाका अनुसार बुधबार राती देशभर सामान्यदेखि पूर्ण बदली रही अधिकांश स्थानहरुमा वर्षा हुनेछ । देशका पूर्वी तराईका थोरै स्थानहरुमा तथा मध्य र पश्चिमका एक–दुई स्थानमा भारी वर्षा हुने सम्भावना छ ।

बिहीबार दिउँसो देशभर सामान्य बदली रही देशका केही स्थानहरुमा वर्षा हुनेछ। देशको पश्चिम तथा पूर्वका एक वा दुई स्थानहरुमा भारीको सम्भावना रहेको छ ।

राती देशभर सामान्य बदली रही केही स्थानहरुमा वर्षा हुनेछ । देशको मध्य र पश्चिम तराईका एक वा दुई स्थानहरुमा भारी वर्षाको सम्भावना रहेको छ ।
शुक्रबार दिउँसो देशभर सामान्य बदली रही देशका केही स्थानहरुमा वर्षा हुनेछ। देशको पश्चिम भेगका एक वा दुई स्थानहरुमा भारीको सम्भावना रहेको छ ।

राती देशभर सामान्य बदली रहि केही स्थानहरुमा वर्षा हुनेछ । देशको पश्चिम तराईका थोरै स्थानहरुमा भारीको सम्भावना छ ।

महाशाखाका अनुसार आगामी २४ घण्टा देशका पूर्व र मध्यका थोरै स्थान र पश्चिमका एक दुई स्थानमा भारी वर्षाको सम्भावना छ ।

त्यसैले ती क्षेत्रका पहाडी भू–भागमा पहिरो जान सक्ने तथा पहाड तथा चुरेबाट बहने खोलाहरुमा जल सतह बढ्न सक्ने भएकोले सतर्कता अपनाउन चेतावनी जारी गरिएको छ । महाशाखाले हवाई तथा सडक यातायातमा समेत प्रभाव पर्न सक्ने भएकोले सतर्कता अपनाउनसमेत भनेको छ ।