नेपालमा सामसङ र शाओमी ब्राण्डको बिजोग, ओपोको नामनिशानै छैन !

काठमाडौं । मोबाइल ब्राण्डहरु मध्ये नेपालमा कुनैसमय एकक्षत्र राज गरेको दक्षिण कोरियाली ब्राण्ड सामसङको हिस्सा १० प्रतिशतमा खुम्चिएको छ । त्यसैगरि अर्को ठूलो स्मार्टफोन ब्राण्ड शाओमीको हिस्सा भने दोहोरो अंकमा समेत पुग्न सकेको छैन् ।

नेपाली बजारमा प्रमुख हिस्सा सस्ता र नामै नसुनेका कम्पनीहरुले लिएको देखिएको छ भने अर्कोतर्फ चर्चित ब्राण्डहरुको हिस्सा निकै कमजोर र नगन्य मात्र रहेको छ ।

नेपालमा आयात हुने मोबाइल फोनहरुको दर्ताको आधारमा हेर्दा नेपालमा सबैभन्दा धेरै लाभा मोबाइलको आयात हुने गरेको देखिन्छ। सो मोबाइल ब्राण्डको हिस्सा १५ प्रतिशत रहेको छ ।

त्यसपछि भने अर्को हंगकंगमा आधारित चिनियाँ ब्राण्ड आईटेलले लिएको छ जसको हिस्सा १३ प्रतिशत छ भने सामसंग १० प्रतिशतको हिस्सामा खुम्चिएर तेस्रो स्थानमा रहेको छ ।

नेपाली मोबाइल फोन ब्राण्ड कलर्स भने प्रमुख पाँच भित्र समावेश हुँदै चौथो नम्बरमा रहेको छ जसले ९ प्रतिशत हिस्सा लिएको देखिन्छ । चिनियाँ स्मार्टफोन ब्राण्ड शाओमी ८ प्रतिशत हिस्सा लिँदै पाँचौं स्थानमा रहेको देखिन्छ ।

त्यसैगरि नोकिया ७ प्रतिशतसहित छैटौं स्थानमा, किवी मोबाइल ५ प्रतिशत सहित सातौं स्थानमा छ भने अर्को भारतीय ब्राण्ड ट्याम्बो ५ प्रतिशत हिस्सा सहित आठौं स्थानमा छ ।

चिनियाँ ब्राण्ड भिभो भने ३ प्रतिशत हिस्सासहित नवौं स्थानमा छ भने निकै कम मात्र नाम सुनिएको मोबाइल ब्राण्ड रियोटले ३ प्रतिशत हिस्सा लिएको छ।

यो तथ्यांक नेपालमा आयात हुने मोबाइल फोनहरुको ब्राण्डको आधारमा राखिएको इक्वूपमेन्ट आईडेन्टिटी रजिस्ट्रर अर्थात उपकरण पहिचान दर्ताको आधारमा लिएको हो ।

नेपाल भित्र आयात हुने मोबाइल फोनहरुको लागि सबैभन्दा पहिले नेपाल दूरसञ्चार प्राधिकरणबाट अनुमति लिनुपर्ने हुन्छ भने आयात भएका सम्पूर्ण मोबाइल फोनहरुको दर्ता र आईएमईआई नम्बर प्राधिकरणमा दर्ता गरिएको हुन्छ ।

प्राधिकरणले केहि समयअघि सञ्चार तथा सूचना प्रविधि मन्त्री समक्ष बुझाएको वार्षिक प्रतिवेदन २०७६/७७ मा इक्वूपमेन्ट आईडेन्टिटी रजिस्ट्ररको आधारमा सो तथ्यांक उल्लेख गरिएको छ ।

सो तथ्यांकमा अर्को चर्चित चिनियाँ स्मार्टफोन ब्राण्ड ओपोको नामै उल्लेख छैन अर्थात सो ब्राण्डको हिस्सा नेपाली बजारमा अत्यन्त न्यून रहेको अनुमान गर्न सकिन्छ।

नेपालमा सामसङ र शाओमी ब्राण्डको बिजोग, ओपोको नामनिशानै छैन !
तथ्यांकअनुसार अन्य विभिन्न ब्राण्डका फोनहरुको हिस्सा समग्रमा २२ प्रतिशत रहेको देखिन्छ ।

नेपालमा आधिकारीकरुपमा आयात हुने मोबाइल फोनहरुको सम्पूर्ण दर्ता प्राधिकरणमा नै रहने हुँदा सोहि आधारमा कम्पनीहरुले आयात तथा बिक्री गर्ने गर्दछन् ।

अझ आयात भएकामध्ये कतिपय फोनहरु बजारमा बिक्री नभई स्टकमा रहने गर्दछन् । त्यसैले प्राधिकरणले दिएको आयातको तथ्यांकभन्दा निकै कम बजार हिस्सा हुने संभावना रहन्छ ।

अधिकांश कम्पनीहरुले आफ्नो बजार हिस्सा अत्यधिक भएको दाबी गर्ने गर्दछन तर फोन आयात भएको संख्या भन्दा बिक्री संख्या अधिक हुँदैन् ।

तर नेपाल जस्तो खुला सिमानाका भएको देशमा अझैपनि अवैध र चोरीका फोनहरु आउने हुँदा त्यसले भने केहि बजार हिस्सा बढाउन सहयोग गर्ने संभावना रहन्छ । तर त्यो निकै न्यून हुने गरेको देखिन्छ ।

नेपालमा ४ दर्जन भन्दा बढि मोबाइल ब्राण्डका फोनहरु औपचारिकरुपमा आयात र बिक्री हुने गरेका छन् ।technologykhabar.com