सुनकोशी–मरिण डाइभर्सन आयोजनाको सुरुङ आज ब्रेक–थ्रु

काठमाडौं । सुनकोशी–मरिण डाइभर्सन आयोजनाको सुरुङको आज ब्रेक–थ्रु गरिदैँछ । प्रधानमन्त्री पुष्पकमल दाहालको उपस्थितिमा सुरुङ ब्रेक–थ्रु गर्न लागिएको हो ।

सुरुङ ब्रेक–थ्रु गर्ने कार्यक्रमका लागि प्रधानमन्त्री दाहाल मंगलबार साँझ नै सिन्धुली पुग्नुभएको हो । प्रधानमन्त्री दाहालले आज बिहान आयोजना अवलोकन गर्नुभएको थियो ।

आयोजनाको प्रवेशद्वार कमलामाई नगरपालिका–२ कुसुमटारबाट सुरुङ खन्न सुरु गरिएको थियो । उक्त सुरुङ सुनकोशी गाउँपालिका–७ को सुनकोशी र तामाकोशी दोभानबाट करिब ९ सय मिटर तल पर्ने कानढुंग्री भन्ने स्थानसम्म छेडिने छ । सुरुङ खन्ने टनेल बोरिङ मेसिन (टिबिएम मेसिन) आज सुनकोशी नदी किनारको कानढुंग्रीबाट निस्किने छ ।

आयोजनामा कुल १३ दशमलव ३ किलोमिटर लामो सुरुङ निर्माण हुनेछ । सुनकोशीको पानी सुरुङमार्फत मरिण खोलामा खसालेर ३१ मेगावाट बिजुली उत्पादन पनि गरिनेछ । सोही पानीबाट धनुषा, महोत्तरी, सर्लाही, रौतहट र बारा जिल्लाका कुल १ लाख २२ हजार हेक्टर जमिनमा बाह्रै महिना सिँचाइ सुविधा पुर्‍याउने सरकारको लक्ष्य छ ।

आयोजनाको १३ दशमलव ३ किलोमिटर लामो सुरुङमा पानी पठाउन सुनकोशी नदीमा ३० मिटर उचाइ र १ सय ५८ मिटर लम्बाइको बाँध बनाउने काम जारी छ ।