तीनओटा ट्रक ठोक्किँदा एकजनाको मृत्यु, चार घाइते

लहान, माघ १२ । पूर्व–पश्चिम राजमार्गअन्तर्गत् सप्तरीको खडक नगरपालिका–४ अमहास्थित सडकमा शुक्रबार दिउँसो तीनओटा मालबाहक ट्रक एकापसमा ठोक्किँदा एकजना चालकको मृत्यु भएको छ । चारजना घाइते भएका छन् ।

पूर्वबाट पश्चिम जाँदै गरेको ना४ख ५५६६ नम्बरको ट्रक र विपरीत दिशाबाट आउँदै गरेको ना२ख ८७३० तथा ना७ख १८३५ नम्बरको ट्रक एकापसमा ठोक्किँदा ट्रक चालक उदयपुर, त्रियुगा नगरपालिका–४ का कविराम माझीको घटनास्थलमै मृत्यु भएको इलाका प्रहरी कार्यालय कड्रबोनाले जनाएको छ ।

सोही दुर्घटनामा परी त्रियुगा नगरपालिका–४ का शैला दनुवार, उनीकी आमा सञ्जना दनुवार, सोही ठाउँकी रञ्जु माझी र नीरबहादुर माझी घाइते भएका छन् ।

घाइतेको लहानस्थित सप्तऋषि नर्सिङ होममा उपचार भइरहेको प्रहरीले जनाएको छ । रासस