अब नेपालमै ग्यास उत्पादन : ललितपुरमा निस्किएको ग्यास मन्त्रीले बाले

ललितपुर  । ललितपुर इमाडोलमा परिक्षणपछि निस्किएको प्राकृतिक ग्यास मिथेन बालेर उद्योगमन्त्री नविन्द्रराज जोशीले बलेर उद्घाटन गरेका छन् । खानी विभाग,पुल्चोक इन्जिनियरिङ्ग क्याम्पस र नास्टको संयुक्त परिक्षणपछि इमाडोलमा शुक्रबारबाट मिथेन ग्यास उत्पादन शुरु भएको हो ।

उद्योगमन्त्री नवीन्द्रराज जोशीले इमाडोल क्षेत्रको प्राकृतिक ग्यास भण्डारणको परीक्षण गरे । उनले परीक्षणपछि टेकु लगायत अन्य संभावित क्षेत्रमा पनि प्राकृतिक ग्यास उत्खननको काम शुरु गर्ने बताए । उनले सरकारी टोलीले अपेक्षा गरेअनुरुप ग्यास नआएपनि अन्य क्षेत्रमा प्राथमिकताका साथमा ग्यास उत्खनन् गर्न सरकार लागिपर्ने बताए ।

इमाडोलमा परिक्षण उद्घाटन गरिए पनि यो व्यावसायिक उत्पादन भने होइन । व्यावसायिक उत्पादनका लागि सरकारले धेरै काम गर्न बाँकी रहेको खानी विभागका महानिरिक्षक राजेन्द्र खनाल बताउँछन् । व्यावसायिक उत्पादनका लागि धेरै परिमाण ग्यास हुन आवश्यक रहेको त्यसको पनि परिक्षण हुन बाँकी छ ।

ग्यास उत्खनन् टोलीका सदस्य इन्जिनियर सुबास पौडेलले इमाडोल लगायत काठमाडौंका विभिन्न भागमा ग्यास भण्डारण रहेको बताए । उनले प्राकृतिक ग्यासलाई भण्डारण गरेर मात्र वितरण गर्न सकिने बताए । इन्जिनयिर पौडेलले इमाडोलमा प्राकृतिक ग्यास यति नै छ भन्ने यकिन नभएको बताए ।

थापाथली इन्जिनियरिङ क्याम्पसका उपप्राध्यापक राजकुमार चौलागाईले प्राकृतिक ग्यास उत्खनन गर्दा पानीको मात्रा बढी हुने बताए । उनले ग्यास शुद्धिकरण गरेर मात्र प्रयोगमा ल्याउन सकिने भएकाले सोही अनुसारको पूर्वाधार तयार पारिएको जाकारी दिए ।

काठमाडौंमा २७ वर्षअघि नै जापानी नियोग जाइकाले प्राकृतिक ग्यास उत्पादन गर्न सकिने प्रतिवेदन दिएपछि त्यसको उत्खनन्को काम शुरु भएको थियो । तर सरकारी निकायले प्राकृतिक ग्यास निकाल्ने काममा चासो नदेखाएपछि बढ्न सकेको थिएन ।

इमाडोलको परिक्षण प्लान्ट बनाउन ५० लाख लागत लागेको छ ।