जुवा तास खेल्ने ९ जना पक्राउ

काभ्रे ।  बनेपा नगरपालिका–५ स्थित लहरमान कपालीको घरमा अबैध रुपमा तास खेल्ने खेलाउने ९ जनालाई प्रहरीले पक्राउ गरेको छ ।

पक्राउ पर्नेहरुमा काशीखण्ड नगरपालिका–१३ घर भई बनेपा नगरपालिका–५ नयाँ बस्ती बस्ने २७ बर्षीय कृष्ण लामा, शिखर आम बाटो–५ घर भएका सुरेश लामा , काशीखण्ड–१३ घर भएका ४० बर्षीय काला तामाङ , बनेपा बस्ने ३७ बर्षीय दिपक थापा , ५० बर्षीय गोबर्धन भन्ने सिताराम दाहाल, ४६ बर्षीय सागर शाही, ६३ बर्षीय रामचन्द्र बजगाई , ६४ बर्षीय रामशरण पण्डीत र ६० बर्षीय लहरमान कपाली रहेका छन् ।

कपालीको घरमा जुवा तास खेली रहेको खबर प्राप्त भएपछि इलाका प्रहरी कार्यालय बनेपाबाट खटिएको प्रहरी टोलीले उनीहरुलाई विहिबार नगद ९१ हजार ८ सय १५ रुपैयाँ र तास सहित पक्राउ गरेको हो ।
यस सम्बन्धमा प्रहरीले आवश्यक अनुसन्धान गरिरहेको छ ।

लागूऔषधसहित पक्राउ 

त्यस्तै विभिन्न ठाउँबाट लागूऔषधसहित दुई जनालाई प्रहरीले पक्राउ गरेको छ । महोत्तरी साडा–६ जाउखा बस्ने २० बर्षीय सोनु ठाकुरलाई प्रहरीले नियन्त्रित लागू औषध कोरेक्स ४१ बोतल सहित पक्राउ गरेको छ ।

चन्द्रपुर नगरपालिका–८ स्थित पुर्वपश्चिम राजमार्गको पौराई बजारमा विहिबार प्रहरीले ना.५ ख ७२३७ नंम्बरको बस चेकजाँच गर्दा ठाकुरको झोलाबाट उक्त कोरेक्स बरामद भएको थियो ।

त्यसैगरी बिरगंजबाट पथलैयातर्फ चल्ने सिटि राइड बसमा सवार राजु श्रेष्ठलाई प्रहरीले नियन्त्रित लागू औषध फेनारगन २४ थान, बुफेन २४ थान, डाइजेपाम २४ थान सहित पक्राउ गरेको छ ।

इलाका प्रहरी कार्यालय जितपुरबाट खटिएको प्रहरी टोलीले गढीमाई नगरपालिका–७ स्थित गढीमाई मन्दिर अगाडी उक्त बसलाई चेकजाँच गर्दा श्रेष्ठले बोकेको झोलाबाट उक्त लागू औषध बरामद भएको थियो ।

यस सम्बन्धमा स्थानीय प्रहरीले आवश्यक अनुसन्धान गरिरहेको छ ।