‘ड्यूटी’को विषयमा विवाद हुँदा’ सेक्युरिटी गार्डको हत्या

काठमाडौं, माघ १६ । मछिन्द्रबहालमा सोमबार अज्ञात व्यक्तिको आक्रमणमा परी मृत्यु भएका तुलबहादुर तामाङको हत्या अभियोगमा एक व्यक्ति पक्राउ परेका छन् ।

दोलखा, शैलुङ गाउँपालिका घर भइ इस्टुवेट सेक्युरिटी कम्पनीमा गार्डकारुपमा काम गर्ने तामाङ घाइते भइ लडिरहेको अवस्थामा सोमबार बिहान १ बजे महानगरीय प्रहरी वृत्त जनसेवाले फेलापारी उपचारका लागि राष्ट्रिय ट्रमा सेन्टर, वीर अस्पतालमा लैजाँदै गर्दा बाटोमै मृत्यु भएको थियो ।

महानगरीय अपराध महाशाखाको टोली र प्रहरी वृत्त जनसेवासमेतको संयुक्त टोलीले अनुसन्धानकाक्रममा सो घटनामा संलग्न मकवानपुर, थाहा नगरपालिकाका राजन थापा क्षत्रीलाई पक्राउ गरेको छ ।

अनुसन्धानकाक्रममा निज राजन थापा क्षत्री मछिन्द्रबहालचोकमा सेक्युरिटी गार्डकारुपमा काम गर्नेे गरेको र मृतक तामाङसँग तीन/चार महिनादेखि चिनजान भइ एकै ठाउँमा काम गर्दै आएको खुलेको छ ।

‘ड्यूटी’को विषयलाई लिइ दुईबीच वादविवाद हुँदै आएकामा गत आइतबार राति निज थापा क्षत्रीले तामाङलाई आफू ड्यूटी गर्न आउन नसक्ने भनी जानकारी गराउन जाँदा विवाद भएपछि क्षत्रीले पटक–पटक इँटाले टाउकामा प्रहार गरेर तामाङको हत्या गरी भागेको खुल्न आएको प्रहरीले जनाएको छ ।

अभियुक्त क्षत्रीलाई मुलुकी ऐन ज्यानसम्बन्धी महलबमोजिम कारबाही अघि बढाइने भएको छ । रासस