श्रीमतीलाई भर्खरै आउँछु भनेर गएका जीवन तामाङले किन गरे प्रेमिकासँग आत्महत्या ?

भक्तपुर। भक्तपुरको बोडेमा एक जोडीले आत्महत्या गरेका छन् । यहाँ कोठा भाडामा लिएर बस्ने २१ वर्षका जीवन तामाङ र १८ वर्षकी मंगली घिसिङले आत्महत्या गरेका हुन् । उनीहरुबीच प्रेम सम्बन्ध रहेको बताइएको छ । जीवन विवाहित हुन् र उनकी श्रीमतीसहित १ छोरी पनि छिन् । पछिल्लो समय जीवन श्रीमती र छोरी छाडेर मंगलीसँग बस्न थालेका थिए ।

सिन्धुपाल्चोक बाह्रबिसेका जीवन र रामेछापको बेथानकी मंगलीले मंगलबार आफ्नै कोठामा झुन्डिएर आत्महत्या गरेको प्रहरीले जानकारी दिएको छ । पछिल्लो समय जीवन मंगलीसँग बस्न लागेपछि उनकी श्रीमती रितु तामाङले प्रहरीमा उजुरी दिएकी थिइन् । रितुले ११ साउनमा श्रीमान् अर्की केटीसँग लागेर आफूलाई नहेरेको भन्दै उनलाई झिकाइ आवश्यक कारबाही गरिपाऊँ भनेर उजुरी दिएकी थिइन् ।

प्रहरीले उनलाई झिकाएर अबदेखि रितुसँग नै बस्ने तथा उनलाई लाउन खाने व्यवस्थासमेत गर्ने प्रतिबद्धता गराएको थिए । यसपछि जीवन श्रीमतीसँगै निस्किएका थिए । प्रहरीका अनुसार जीवनले बाहिर निक्लिएपछि श्रीमतीलाई एक हजार दिँदै आफू केही समयमै आउँछु भनेका थिए । तर, जीवन प्रेमिकासँगै झुन्डिएको अवस्थामा मंगलबार फेला परेको प्रहरीले जनाएको छ ।

जीवन तामाङ सवारी चालक थिए । प्रहरीले यो घटनाबारे अनुसन्धान भइरहेको जानकारी दिएका छन् । दुवैको शव पोस्टमार्टमका लागि त्रिवि शिक्षण अस्पताल महाराजगन्ज पठाएको र थप अनुसन्धान भइरहेको प्रहरीले जनाएको छ ।