मृतक युवकमा कोरोना संक्रमण पुष्टि भएपछि क्वारेन्टाइनमा त्रास बढ्यो

दैलेख । क्वारेन्टाइनमा मृत्यु भएका दुल्लु–११ का ३५ वर्षीय पुरुषमा कोरोना संक्रमण पुष्टि भएसँगै दैलेखको दुल्लुस्थित विद्युत कार्यालयलाई चारैतिरबाट बन्द गरिएको छ ।

दैलेखको दुल्लुस्थित अन्य क्षेत्र र क्वारेन्टाइनमा रहेका अन्य व्यक्तिमा संक्रमण फैलिन नदिन थप सुरक्षाका लागि नेपाली सेना, सशस्त्र प्रहरी बल र नेपाल प्रहरीको टोलीले आवतजावतमा रोक लगाएर विद्युत कार्यालय बन्द गराएको इलाका प्रशासन कार्यालय दुल्लुका कायममुकायम शाखा अधिकृत रमेश खनालले जानकारी दिए ।

खनालका अनुसार कोरोना संक्रमितको शव व्यवस्थापन स्वास्थ्य तथा जनसंख्या मन्त्रालयले तयार गरेको कार्यविधिका आधारमा गरिने तयारी भएको छ । उक्त कार्यविधिमा नेपाली सेना, नेपाल प्रहरीलगायत सुरक्षाकर्मीसहित मिलेर शवको अन्त्येष्टि गर्ने उल्लेख छ ।

मृत्युको कारण पिसिआर रिपोर्ट पोजेटिभ भएकाले सोहीअनुसार अन्त्येष्टि गरिएको उनले बताए । कोरोनाबाट मृत्यु भएका युवकको दुल्लु नगरपालिकाको समन्वयमा नेपाली सेना, नेपाल प्रहरी र सशस्त्र प्रहरीले अन्त्येष्टी गरेको हो ।

पीसीआर रिपोर्ट नआउँदासम्म शनिबार दिनभर ती युवकको शव क्वारेन्टाइनमै राखिएको थियो ।

ती युवक ७ जेठमा ७९ जना नेपाली साथीसहित भारतबाट नेपाल आएका थिए । भारतबाट आएका कारण उनीसहितको टोलीलाई विद्युत प्राधिकरणको भवनमा निर्माण गरिएको क्वारेन्टाइनमा राखिएको थियो ।

क्वारेन्टाइनमा बस्दै आएका ती युवक शनिबार बिहान चिया र विस्कुट खाएपछि ढलेका थिए । थोरै वान्ता गरेलगत्तै ती युवकको अचानक मृत्यु भएको हो ।

कर्णाली प्रदेशका सामाजिक विकास मन्त्रालयका स्वास्थ्य महाशाखा प्रमुख डा. लक्ष्मी नारायण तिवारीले क्वारेन्टाइनमा मृत्यु भएका युवकको कोरोना भाइरस परीक्षण गर्दा रिपोर्ट पोजेटिभ आएको पुष्टि गरे ।

उनको १५ गते कोरोना जाँचका लागि स्वाव लिई कर्णाली स्वास्थ्य विज्ञान प्रतिष्ठानमा पठाइएको थियो । संकलित स्वावको पीसीआर रिपोर्ट आउन नपाउँदै युवकको मृत्यु भएको हो ।

क्वारेन्टाइनमा मृत्यु भएपछि विद्युत कार्यालयको क्वारेन्टाइनमा थप त्रास छाएको छ । विद्युत कार्यालयको सानो भवनको क्वारेन्टाइनमा मृतकसँगै अन्य ५ जनालाई राखिएको थियो ।

योसँगै नेपालमा कोरोना भाइरस संक्रमणले मृत्यु हुनेको संख्या सात पुगेको छ । यसअघि सिन्धुपाल्चोक, गुल्मी, अर्घाखाँची, ललितपुर, बारा र बाँकेमा पनि १–१ जनाको मृत्यु भएको थियो ।