प्रकाशित मिति : मङ्लबार, चैत्र १७, २०७७
ताप्लेजुङ । सिरिजंघा गाउँपालिका–३ सिकैचामा भएको ट्रिपर दुर्घटनामा एक युवकको मृत्यु भएको छ । प्रदेश ३–०१–०५ ख ९२७१ नम्बरको ट्रिपर दुर्घटना हुँदा लमजुङको दोर्दी गाउँपालिका–६ का १९ वर्षीय कृष्ण विकको ज्यान गएको हो ।
दुर्घटनामा घाइते भएका चालक यामबहादुर विक र मन्दिप लिम्बूकाे झापामा उपचार भइरहेको युनिटेक हाईड्रोपावरका जनसम्पर्क अधिकृत मोहन निरौलाले जानकारी दिनुभयो ।
फावाखोलामा निर्माणाधीन युनिटेक हाईड्रोपावर निर्माण स्थलमा काबेली खोलाबाट बालुवा लिएर जाने क्रममा गए राति दुर्घटना भएको थियो । मृतक विक हाईड्रोपावर निर्माणको ठेक्का लिएको निर्माण कम्पनी, माछापुछ्रे ईन्जिनियरिङ प्रालिका कामदार रहेको निरौलाले जानकारी दिनुभयो ।
मृतकको शव जिल्ला अस्पताल ताप्लेजुङमा पोष्टमार्टम गरी परिवारलाई जिम्मा लगाउने तयारी भइरहेकाे प्रहरीले जनाएको छ । सडकबाट झण्डै ५० मिटर तल खसेकाे ट्रिपर दुर्घटनाको कारण खुल्न सकेको छैन ।
© copyright 2016-2019 and all right reserved to jaljalakhabar | Site By : sobij
