जबर्जस्ती करणीको प्रयासपछि बालिकाकाे हत्या

सप्तरी। सप्तरीमा चार दिनअघि मृत फेला परेकी बालिकाको जबर्जस्ती करणीको प्रयासपछि हत्या भएको रहस्य खुलेको छ।

असार ४ गते डाक्नेश्वरी नगरपालिका–३ हटैलकी ९ वर्षीया शिवानी यादवको शव स्थानीय शिवनाथ यादवको आँपको बगैंचामा भेटिएपछि प्रहरीले हत्या आरोपमा सोही ठाउँका १९ वर्षका युवक रोहितकुमार यादवलाई पक्राउ गरेको छ।

यादवलाई नेपालबाट भारततर्फ जाँदै गरेको गर्दा आइतबार राति पक्राउ गरेको सप्तरीका प्रहरी प्रमुख एसपी राजेन्द्रप्रसाद धमलाले बताए। प्रहरीका अनुसार करणी प्रयासको पोल खुल्ने डरले बालिकाको हत्या भएको प्रारम्भिक अनुसन्धान बाट खुल्न आएको छ। यादव विरुद्ध ज्यानसम्बन्धी मुद्दामा जाहेरी दरखास्त परेको उनले बताए।

गत शुक्रबार शिवानी र उनकी बहिनी बाख्रा चराउन र घाँस काट्न सँगै घरबाट निस्केका थिए। बहिनी बाख्रा हेर्न गएका बेला शिवानी आँप लिन छिमेकीको बगैंचामा गएकी थिइन्। रोहितले आँप दिने लोभ देखाएर करणी गर्ने प्रयास गरेको एसपी धमलाले बताए।

करणीको प्रयासबारे आमालाई भनिदिने भनेपछि रोहितले हत्या गरेको प्रारम्भिक अनुसन्धानबाट देखिएको धमलाको भनाइ छ। उनका अनुसार रोहितले हत्या आरोप स्वीकार गरेका छन्।