संवैधानिक राजसंस्था नेपालको आवश्यकता हो : मनिषा कोइराला

काठमाडौँ। अभिनेत्री मनिषा कोइरालाले नेपालको राष्ट्रियता, सार्वभौमिकता र स्थायित्वका लागि संवैधानिक राजसंस्था आवश्यक रहेको बताएकी छन्।

शनिबार शाही युवा शक्ति, नेपालले आयोजना गरेको ‘राजाको पक्षमा जनताको हस्ताक्षर अभियान-२०८३’ कार्यक्रममा उनले संवैधानिक राजसंस्थाको अवधारणा आफूले बीपी कोइरालाबाट सिकेको बताइन्।

उनका अनुसार बीपी कोइरालाले नेपालको भूगोल, राष्ट्रियता र भविष्यलाई ध्यानमा राख्दै राजसंस्थाको आवश्यकता महसुस गरेका थिए।

राष्ट्रिय मेलमिलापको नीतिले राजसंस्था र प्रजातन्त्रलाई परस्पर विरोधी नभई लोकतन्त्रका पूरकका रूपमा व्याख्या गरेको उनको भनाइ थियो।

कोइरालाले गणतन्त्र स्थापनापछि पनि नेपाली जनताले अपेक्षा गरेको समृद्ध र बलियो राष्ट्र निर्माण हुन नसकेको टिप्पणी गर्दै विदेशी अवधारणाभन्दा राष्ट्रिय आवश्यकतालाई प्राथमिकता दिनुपर्ने बताइन्।

उनले नेपालको एकीकरणसँग जोडिएको संस्थालाई कमजोर बनाउँदा राष्ट्रियता पनि कमजोर हुने दाबी गर्दै देशको स्वतन्त्रता, सार्वभौमिकता र स्थायित्वका लागि संवैधानिक राजसंस्था अपरिहार्य रहेको धारणा व्यक्त गरिन्।