एक सचिवको सरुवासहित दुई सचिवको जिम्मेवारी हेरफेर

काठमाडौँ । सरकारले एक सचिवको सरुवा गर्नुका साथै दुई सचिवको जिम्मेवारी हेरफेर गरेको छ।

पछिल्लो मन्त्रिपरिषद् बैठकले कोशी प्रदेशका प्रमुख सचिव राजेन्द्र पौडेललाई सञ्चार तथा सूचना प्रविधि मन्त्रालयको सचिवमा सरुवा गरेको हो।

सञ्चार मन्त्रालयमा कार्यरत सचिव डा. कमल पोखरेलले केही दिनअघि राजीनामा दिएपछि सचिव पद रिक्त रहेको थियो। रिक्त पदमा पौडेललाई सरुवा गरिएको हो।

त्यसै गरी, राष्ट्रिय सतर्कता केन्द्रका सचिव विश्वबाबु पुडासैनीलाई सार्वजनिक खरिद अनुगमन कार्यालयको सचिवको जिम्मेवारी दिइएको छ।

सिंहदरबारस्थित प्रशासन उच्च स्रोतका अनुसार राष्ट्रिय सतर्कता केन्द्रमा प्राविधिक सचिवको दरबन्दी रहेकोमा त्यसलाई प्रशासनतर्फको बनाइएको छ। यस्तै, सार्वजनिक खरिद अनुगमन कार्यालयमा रहेको प्रशासनतर्फको सचिवको दरबन्दीलाई प्राविधिकतर्फ परिवर्तन गरिएको छ।

दरबन्दीको प्रकृति हेरफेरसँगै प्राविधिकतर्फका सचिव पुडासैनीलाई सार्वजनिक खरिद अनुगमन कार्यालयमा व्यवस्थापन गरिएको स्रोतले प्रशासनलाई जानकारी दिएको छ।