चितवन आइपुग्दा घट्यो बाढी, देवघाटमा खतराको तहभन्दा तलै

काठमाडौँ । भोटेकोशी नदी हुँदै त्रिशूली नदीमा बिहान आएको बाढीको बहाव अहिले चितवन आइपुग्दा घटेको छ। त्रिशूली नदीको बाढी पार भएर आज बिहान ठीक ७:०० बजे मुग्लिन क्षेत्र काटेको थियो।

बाढी पूर्वानुमान महाशाखाका हाइड्रोलोजिष्ट सचित कर्माचार्यले दिएको जानकारीअनुसार त्रिशूली नदीमा पानीको बहाव बाढी आउनुअघिको सामान्य अवस्थाभन्दा तीनदेखि तीन दशमलव पाँच मिटरले बढेको छ।

आज आएको यो बाढी तल गएर नारायणी नदीमा मिसिएपछि त्यसको बहाव दुईदेखि दुई दशमलव पाँच मिटरले बढ्न सक्ने उनको अनुमान रहेको छ। नारायणी नदीको देवघाटस्थित मापन केन्द्रमा यसअघि बाढी आउनुपूर्व पानीको बहाव छ मिटर रहेको थियो र सो स्थानमा पानीको सतह नौ मिटर पुगेपछि मात्र खतरोन्मुख हुने भएकाले हाललाई आत्तिहाल्नुपर्ने कुनै पनि अवस्था नरहेको उनले प्रष्ट पारेका छन्। यद्यपि, पूर्वको तुलनामा नदीमा पानीको सतह केही बढेर आउने भएकाले नदी तटीय क्षेत्रका सम्पूर्ण बासिन्दाहरूलाई उच्च सतर्कता अपनाउन उनले विशेष आग्रह गरेका छन्।

यसैबीच, पृथ्वीराजमार्गको कृष्णभीर क्षेत्रमा सडकको केही भाग भासिएपछि सो राजमार्गमा पूर्ण रूपमा यातायात अवरुद्ध भएको चितवनका प्रहरी नायब उपरीक्षक सुवास भट्टले जानकारी दिएका छन्। सडक भासिएको कारण चितवनतर्फबाट पृथ्वीराजमार्ग हुँदै अन्यत्र गुड्ने सवारीसाधनहरूलाई सम्भावित दुर्घटनाबाट जोगाउन विभिन्न सुरक्षित स्थानहरूमा रोकिएको उनले जानकारी गराएका छन्।

यसअघि भोटेकोशी नदीमा पुनः बाढी आएको खबर फैलिएसँगै आज बिहान ४:०० बजेदेखि सुरक्षाका कारण रोकिएको सडक बिहान ७:०० बजे केही समयका लागि खुले पनि कृष्णभीरमा सडक भासिएका कारण अहिले पुनः सवारीसाधनहरूको आवागमनमा पूर्ण रोक लगाइएको प्रहरी नायब उपरीक्षक भट्टले बताएका छन्।