हाइड्रो पावरको सुरुङभित्र थुनिएका तीन जनाको शव भेटियो

बझाङ । बझाङको बुंगल नगरपालिकास्थित कालङ्गा हाइड्रो पावरको सुरुङभित्र थुनिएका मध्ये तीन जनाको शव भेटिएको छ ।

सशस्त्र प्रहरी बल, नेपाल विपद् व्यवस्थापन तालिम शिक्षालाय कुरिनटारबाट गएको उद्धार टोली सोमबार थुनिएका चारमध्ये तीजनाको शव फेला पारेको हो ।

जिल्ला प्रहरी कार्यालय बझाङका प्रवक्ता ईश्वरीदत्त पाण्डेयका अनुसार सोमबार दिउँसो साढे ३ बजेको समयमा उनीहरुको शव सुरुङभित्र भेटिएको हो । ‘उद्धार टोलीले तीन जना मजदुरको शव सुरुङभित्र भेट्टाएको छ’, उनले भने, ‘हराइरहेका अर्का एक जनाको पनि खोजी भइरहेको छ तर फेला पार्न सकिएको छैन ।’

सुरुङभित्र लगिएको अक्सिजनको पाइपलाइन एकाएक अवरुद्ध भएपछि उनीहरू निसास्सिएर थुनिएका थिए । सुरुङभित्र दैलेखका कर्णबहादुर शाही, महेन्द्रबहादुर शाही, अछामका महेन्द्र साउद र बझाङका शेरसिंह धामी थुनिएका थिए ।

उनीहरुसँगै रहेका अन्य दुई मजदुर भने बाहिर निस्कन सफल भएका थिए । हाइड्रो पावरको सुरुङमा थुनिएका मजदुरको उद्धारका लागि जिल्लास्थित नेपाली सेना, नेपाल प्रहरी र सशस्त्र प्रहरी बलका सुरक्षाकर्मी खटिएका थिए ।

उनीहरुबाट उद्धारको सम्भावना नदेखिएपछि कुरिनटारबाट सशस्त्र प्रहरीको ६ जनाको टोली हेलिकोप्टरमार्फत् बझाङ पुगेको थियो ।