नेपालमा ‘आप्रवासी कामदारहरुको अन्तर्राष्ट्रिय सम्मेलन’ हुने

काठमाडौं। नेपालमा ‘आप्रवासी कामदारहरुको अधिकार संरक्षणसम्बन्धि अन्तर्राष्ट्रिय सम्मेलन’ आयोजना हुने भएको छ। राष्ट्रिय मानव अधिकार आयोगले बिहीबार ललितपुरमा पत्रकार सम्मेलन गरी आप्रवासी कामदारहरुको मानव अधिकार हनन् हुन नदिने उद्देश्यका साथ यही कातिक २६ गतेदेखि २८ गतेसम्म काठमाडौंमा सो अन्तराष्ट्रिय सम्मेलन आयोजना गर्न लागिएको जानकारी गराएको हो।

सो अन्तर्राष्ट्रिय सम्मेलनमा आप्रवासी कामदारहरुले काम गरिरहेका मुलुकका सरकारका प्रतिनिधिहरु, राष्ट्रिय मानव अधिकार आयोग, मानव अधिकारको क्षेत्रका कार्यरत अन्तर्राष्ट्रिय संघ, संस्था र सामाजिक संघ, संस्थाहरुका प्रतिनिधिहरु सहभागी हुने पनि आयोगका सदस्य सुदिप पाठकले जानकारी दिए।

आयोगले सो अन्तर्राष्ट्रिय सम्मेलनबाट आप्रवासी कामदारहरुको मानव अधिकार संरक्षणमा दक्षिण एशीया तथा एशीया प्रशान्त क्षेत्रका मुलुकहरु जिम्मेवार बन्ने अपेक्षा गरेको छ । उपराष्ट्रपति नन्दबहादुर पुनले उद्घाटन गर्ने सो अन्तर्राष्ट्रिय सम्मेलनमा आप्रवासी कामदारहरुको मानव अधिकार संरक्षणसम्बन्धि ५ वटा कार्यपत्र समेत प्रस्तुत गर्ने कार्यक्रम तय गरिएको छ।

राष्ट्रिय मानव अधिकार आयोगले आप्रवासी कामदारहरुको मानव अधिकार संरक्षणका लागि क्षेत्रीय, राष्ट्रिय हुँदै अन्तर्राष्ट्रिय स्तरका सम्मेलन सुरु गर्न थालेको हो । आयोगका सदस्य पाठकका अनुसार आयोगले अन्तर्राष्ट्रिय मानव अधिकार आयोगलाई पनि आप्रवासी कामदारहरुको मानव अधिकार संरक्षणका लागि अन्तर्राष्ट्रिय सम्मेलन आयोजना गर्न आग्रह गर्ने तयारी पनि गरेको छ।