महेन्द्रनगरमा बम विष्फोट : एकै परिवारका दुई जनाको मृत्यु, चार जना घाइते

महेन्द्रनगर बजार नजिकै बम विस्फोट हुँदा एकै परिवारका दुई जनाको मृत्यु भएको छ भने प्रहरी निरीक्षक सहित चार जना घाइते भएका छन्। धनुषाको छिरेश्वरनाथ नगरपालिका–५ महेन्द्रनगर बजारबाट उत्तरपूर्वतर्फ पर्ने कुचाइ टोलमा राजेश साहको घर बाहिरको पोलमा राखिएको शुक्रबार राति सवा १२ बजेतिर बम विष्फोट हुँदा ४५ वर्षीय राजेश साह र उनको २५ वर्षीय छोरा आनन्दको मृत्यु भएको प्रहरीले जनाएको छ।

प्रहरीका अनुसार उक्त घटनामा राजेश साहको १९ वर्षीया छोरी अञ्जली, १५ वर्षको छोरा प्रकाश, प्रहरी निरीक्षक अमिर कुमार दाहाल र प्रहरी जवान रिजनाथ कुमार महतो घाइते भएका छन्। उनीहरुलाई जनकपुर प्रादेशिक अस्पतालमा प्रारम्भिक उपचार गरेर थप उपचारका लागि बीपी कोइराला स्वास्थ्य विज्ञान प्रतिष्ठान धरानमा पठाइएको छ। राजेश साहको घर बाहिरको पोलमा शंकास्पद वस्तु रहेको जानकारी पाएपछि इलाका प्रहरी कार्यालय महेन्द्रनगरबाट प्रहरी निरीक्षक अमिर कुमार दाहालसहितको टोली खटिएको थियो। त्यहाँ जम्मा भएको भिडभाड हटाउँदै गर्दा बम विष्फोट भएको थियो। विष्फोटमा प्रहरी निरीक्षक दाहाल र प्रहरी जवान महतोको बायाँ कोखमा छर्रा लागेको बताइएको छ।