प्रकाशित मिति : आइतवार, अशोज १८, २०८३
हार्मनी यसअघि ‘रियल अमेरिकाज भ्वाइस’मा ह्वाइट हाउस संवाददाताका रूपमा कार्यरत थिइन् । उनले सोमबारदेखि नयाँ जिम्मेवारी सम्हाल्नेछिन् ।
हार्मनीको नियुक्ति ह्वाइट हाउसमा स्थायी प्रेस सेक्रेटरीको पद रिक्त रहेका बेला भएको हो । यसअघि प्रेस सेक्रेटरी रहेकी क्यारोलिन लेभिटले अगस्टको अन्त्यमा पदबाट राजीनामा दिएकी थिइन् । ट्रम्प प्रशासनले अहिलेसम्म उनको स्थायी उत्तराधिकारी घोषणा गरेको छैन ।
हार्मनी पछिल्लो समय ह्वाइट हाउस प्रेस पूलकी नियमित सदस्य बनेकी थिइन् । उनले राष्ट्रपति ट्रम्पसँग आयरल्यान्डको यात्रासमेत गरेकी थिइन् ।
सन् २०२५ सेप्टेम्बरमा ‘रियल अमेरिकाज भ्वाइस’सँग जोडिएकी हार्मनी त्यसअघि इलिनोइसको स्प्रिङ्गफिल्डमा समाचार एङ्करका रूपमा कार्यरत थिइन् । त्यहाँको काम छाडेपछि उनले राष्ट्रियस्तरमा ट्रम्प प्रशासनका गतिविधिबारे रिपोर्टिङ गर्दै आएकी थिइन् ।
अब भने पत्रकारका रूपमा ह्वाइट हाउसको गतिविधि रिपोर्ट गर्दै आएकी हार्मनी स्वयं ट्रम्प प्रशासनको सञ्चार टोलीको सदस्य बनेकी छन् ।
ह्वाइट हाउसकी प्रिन्सिपल डेपुटी प्रेस सेक्रेटरी एना केलीले हार्मनीको नियुक्तिको स्वागत गरेकी छन् ।
‘हार्मनी ह्वाइट हाउस संवाददाताका रूपमा ट्रम्पको आन्दोलनकी भरपर्दो आवाज रहिआउनुभएको थियो र अब सहायक प्रेस सेक्रेटरीका रूपमा उहाँ सञ्चार टोलीको हिस्सा बन्नुहुनेछ,’ केलीले भनेकी छन् ।
हार्मनीले पनि नियुक्तिप्रति उत्साह व्यक्त गरेकी छन् ।
‘म ट्रम्प प्रशासनमा ह्वाइट हाउसको सहायक प्रेस सेक्रेटरीका रूपमा सामेल हुन पाउँदा उत्साहित छु । म यसका लागि राष्ट्रपति ट्रम्पको विश्वासका लागि आभार व्यक्त गर्छु,’ उनले भनेकी छन् ।
यसअघि ह्वाइट हाउस प्रेस सेक्रेटरी रहेकी क्यारोलिन लेभिटले अगस्टको अन्त्यमा पद छाडेकी थिइन् । उनले परिवारसँग बढी समय बिताउन जिम्मेवारी छाड्ने निर्णय गरेको बताइएको थियो ।
ट्रम्पले लेभिटको कामको प्रशंसा गर्दै उनी आगामी दिनमा पनि आफ्नो राजनीतिक काममा सल्लाहकारको भूमिकामा जोडिने बताएका थिए ।
लेभिट २७ वर्षको उमेरमा ह्वाइट हाउस प्रेस सेक्रेटरी बनेकी थिइन् । उनी उक्त पद सम्हाल्ने सबैभन्दा कम उमेरकी व्यक्ति बनेकी थिइन् ।
लेभिटले पद छाडेपछि ह्वाइट हाउसले अहिलेसम्म स्थायी प्रेस सेक्रेटरी नियुक्त गरेको छैन । यसबीच प्रशासनका अन्य अधिकारीहरूले प्रेससम्बन्धी जिम्मेवारी सम्हाल्दै आएका छन् ।
अब २४ वर्षीया हार्मनीको नियुक्तिले भने ह्वाइट हाउसको सञ्चार टोलीमा नयाँ पुस्ताको अनुहार थपिएको छ ।
© copyright 2016-2019 and all right reserved to jaljalakhabar | Site By : sobij
